OMENAJEN HO FUAN BA AMU-PAPA FRANCISCO: BIBI-ATAN DAME, KOMPAIXAUN, NO UNIDADE BA MUNDU NO BA TIMOR-LESTE

 

Sua Santidade Papa Francisco

Iha tempu ne’ebé mundu triste tebes ho Sua Santidade Papa Francisco nia mate, ita, povu Timor-Leste, hamutuk ho komunidade globál hodi oferese ita-nia orasaun, gratidaun, no hanoin hikas Papa Francisco ida ne’ebé la’o ho haraik-an no lidera ho aten-barani ho domin. Ninia mate la'ós de'it rohan, maibé ida ne'e símbolu moris-hi'as no esperansa rohan-laek nian, ne'ebé repete Jesus Kristu nia manan hasoru mate.

Amu-Papa Francisco la'ós de'it ulun-na'in Igreja Katólika Romana nian; Nia hanesan aman ida ba ema kiak sira, lian ba ema sira ne'ebé laiha lian, defensór dame nian, justisa, no dignidade umana. Durante nia papadu tomak, nia fó hanoin mai ita hotu katak grandeza loloos harii iha servisu no haraik-an. Ba ita timoroan sira, ne’ebé ita-nia fiar sempre iha ita-nia identidade no reziliénsia, Papa Francisco nia domin no prezensa pesoál kona ita ho profundu.

Ninia vizita istóriku mai Timor-Leste iha tinan kotuk nu’udar momentu sagradu ida ne’ebé sei la haluha. Durante nia la’o iha ita-nia le’et, haraik bensaun ba ita-nia rai, no ko’alia liafuan enkorajamentu no dame nian, ita sente prezensa real Kristu nia mizerikórdia no kompaixaun nian. Ida ne'e mak peregrinasaun unidade no kura nian, nu’udar provas ba nia kuidadu sinseru to’o iha fatin ki’ik no nasaun ki’ak sira.

Ninia mensajen sira ba mundu ko'alia beibeik kona-bá kompaixaun, perdaun, no kuidadu ambientál. Nia inspira moris barak liuhosi ensíklika sira hanesan ‘Laudato Si', ne'ebé bolu umanidade atu proteje ita-nia uma komún, no Fratelli Tutti, ne'ebé husu ita atu hakuak fraternidade universál. Hanorin hirak ne’e moris iha Timor-Leste, iha ne’ebé ita kontinua haka’as-an ba unidade, dame, no dezenvolvimentu sustentável hafoin luta tinan barak.

Ita hanoin daudaun kona-bá nia mate, mai ita reflete katak mate la taka bibi-atan loos nia lian. Envezde, hanesan Kristu Moris-Hi'as, Papa Francisco nia legadu moris nafatin, ho orasaun ne’ebé harohan nafatin iha aldeia remota sira, iha joven ida-idak ne'ebé inspira hosi nia haraik-an, no iha hahalok laran-di'ak ida-idak ne'ebé moris hosi nia hanorin sira.

Ba Papa Francisco, ita dehan: Obrigadu barak. Obrigadu tanbá mai hasoru ita, tanbá reza hamutuk ho ita, no fó hanoin mai ita katak ita nunka haluha iha Kreda nia matan. Ita-boot nia ezemplu sei kontinua orienta la'ós de'it fiar-na'in katóliku sira maibé ema hotu ne'ebé iha vontade di'ak. 

Que descanse no abraço eterno do Pai, onde o amor não conhece fim.

Do coração de Timor-Leste, a sua memória é honrada. A sua missão continua