KINTA-FEIRA SANTA: KALAN DOMIN, HARAIK-AN, NO SAKRIFÍSIU

Jesus fase Apostolu sira-nia Ain

Introdusaun: Kalan ne'ebé halo buat hotu muda

Kinta-feira Santa mak momentu ida ne'ebé íntimu no kle'an liu iha kalendáriu sarani. Ne’e mak kalan iha-ne’ebé Jezús, konxiente tomak kona-bá terus ne’ebé sei mai, halibur dixípulu sira la’ós ho ta’uk, maibé ho domin.

Kalan sagradu ida ne’e, la’ós de’it inísiu Tríduum Páskua nian, maibé mós konvite maka’as ida mai ita ida-idak: atu serbí malu, atu perdua, no atu hadomi kle’an, hanesan Kristu hadomi.

Han-Kalan Ikus: Liu fali Hahán

Iha Kinta-Feira Santa nia fuan maka Han-Kalan Ikus. Ida ne'e la'ós hahán baibain. Ida ne'e mak momentu ne'ebé Jezús harii Santa Eukaristia, hodi oferese Ninia Isin no Ran iha forma paun no tua nian:

"Halo ida-ne'e hodi hanoin ha'u." ( Lucas 22:19 )

Iha momentu ida ne'e, Kristu fó-An tomak la'ós de'it ba sira ne'ebé halibur iha Nia sorin, maibé ba ita hotu no ba ema tomak. Kada vez ita selebra Eukaristia, ita hanoin fila fali ba meza ne'ebá, kalan ne'ebá, hahalok domin rohan-laek nian ne'ebá.

Fase ain: Lisaun ida kona-bá haraik-an

Jestu ida seluk ne'ebé maka'as iha Kinta-Feira Santa maka fase dixípulu sira nia ain. Iha sosiedade ida ne'ebé fase ain maka kna’ar ida ba atan ne'ebé ki'ik liu, Jezús hola kna’ar atan nian no fase ain sira ne'ebé Nia hadomi.

"Se Ha'u, imi nia Na'i no Mestre, fase ona imi nia ain, imi mós tenke fase malu nia ain." ( Joao 13:14 )

Ida ne'e la'ós de'it rituál ida; ida ne'e mensajen ida. Lideransa loloos iha vida sarani signifika haraik-an no servisu. Iha mundu ne’ebé nakonu ho orgullu no kompetisaun, Kinta-Feira Santa fó hanoin mai ita katak domin hahú iha ema seluk nia ain.

Getsémani: Jardim Agonia nian

Han kalan hotu tiha, Jesus ba iha Jardin Getsemani hodi reza. Iha ne'ebá, Nia sente laran-susar tebes, hodi dehan,

"Ha'u nia klamar triste, to'o mate." ( Mateus 26:38 )

Maibé, maski iha Nia tauk, Nia reza, "La'ós ha'u nia hakarak, maibé Ita-boot nian." Kinta-Feira Santa remata iha silénsiu no tristeza, bainhira Jezús hetan ka’er, abandona no trai. Ida ne'e maka bolun ida mai ita atu matan-moris nafatin iha orasaun, atu la fila kotuk bainhira kalan sai nakukun.

Reflesaun Pesoál: Saida Mak Kinta-Feira Santa Signifika?

Iha ita-nia mundu okupadu, dala barak ita haluha silénsiu nia furak, servisu nia forsa, no prezensa nia kbi’it. Kinta-feira santa hanorin ita atu neineik. Atu servi ita nia familia sira. Atu perdua ita nia maluk sira. Atu rona Maromak nia lian iha kalan nia hakmatek.

Kalan ida ne'e mak konvite no oportunidade ida atu haree ba ita-nia fuan rasik no husu:

Ha'u prontu atu hadomi hanesan Jezús hadomi?

Ha'u prontu atu serbí maski susar?

Ha'u bele dehan, "Ita-boot nia hakarak sai loos", iha ha'u nia moris rasik?

Konkluzaun: Domin Ne’ebé Lori ba Krús

Kinta-feira Santa la'ós rohan, maibé ida ne'e mak inísiu viajen ne'ebé lori ba Krús no hafoin ba Moris-Hi'as. Ida ne'e hanesan lembransa ida katak maski hasoru traisaun, terus, no silénsiu, domin nunka falla.

Kinta-feira Santa ida ne'e loke ita hotu nia fuan ba fiar ne'ebé klean liu, servisu ne'ebé hakmatek liu, no domin ne'ebé aten-barani.